年初二的開年飯

《銀杏館》年初五才啟市，但太子店在年初二卻人頭湧湧，點解呢？

原來《銀杏館》今日免費接待一Ｄ貧窮家庭，開開心心食餐開年飯。

哪次咁有人情味的開年飯，只係籌備左２個星期。 所有當日「返舖頭做野」的同事，全部自由報名，義工身份，無工資無補假。

幕後功臣Joyce四出搵贊助，結果有人贊助魚，有人贊助雞，有人贊助水果……等。稻香集團更贊助（每人＄５０）「現金券」；面銀杏館就負責「包底」，「無邊樣就出邊樣」。

今次「關愛年初二」希望參加的家庭，食得愉快一Ｄ，所以事前特登唔對外宣傳，連ＴＶ新聞採訪都推埋，全程無儀式無演講，真心誠意，唔攪咁多繁文縟節。

初二朝早，一大班義工晨早到位，《銀杏館》主席黎ＳＩＲ操刀切鬆，會計關先生斬雞，資訊科技處彭先生洗碗，女食神心言小姐埋鑊炒菜；一眾雜牌軍披甲上陣，似模似樣。再加埋一班專業的廚師及樓面同事，真係「氣氛輕鬆，嚴謹辦公」架。

當日共有１５０位朋友出席，食的菜式都只是一般家庭開年飯，唔係乜野高貴盛宴，但勝在人情味十足，「嚐」得到果份心意。

離開果陣，真係大部份參加者都由衷咁道謝；感謝的唔係免費午餐，而係互相果份關懷。

總之，今餐開年飯，食的同做的都咁開心。

遲Ｄ，等同事放假返工後，整理好份贊助名單，我地會再向各贊助人及商號一一道謝。

小記在此祝大家事事順利。